Հունվար ամսվա աշխատանքների պլանավորման խորհրդակցության սցենար 2

Հունվար ամիսը դպրոցում կառավարման տեսանկյունից առանձնահատուկ նշանակություն ունի․ այն ապահովում է երկրորդ կիսամյակի մեկնարկը և ամբողջ կիսամյակի աշխատանքի որակը։ Հենց այս պատճառով հունվարի սկզբին տնօրենի կողմից կազմակերպվող աշխատանքային խորհրդակցությունը պետք է լինի ոչ միայն տեղեկատվական, այլև հստակ կառավարչական գործիք՝ ուղղվա պատասխանատվությունների բաշխմանը, ժամկետների սահմանմանը և վերահսկողության մեխանիզմների ներդրմանը։

2025-2026 ուստարվա գործող պլանի հատված

Ստորև ներկայացնում եմ դպրոցի տնօրենի հունվար ամսվա աշխատանքային խորհրդակցության պլանն ու ընթացքի մանրամասն սցենարը, որը կառուցված է ՈՒԴԱՏՊ-ի տրամաբանությամբ և կարող է կիրառվել ցանկացած հանրակրթական դպրոցում։

Խորհրդակցության նպատակը

Խորհրդակցության հիմնական նպատակներն են․

• ներկայացնել հունվար ամսվա ՈՒԴԱՏՊ-ով նախատեսված աշխատանքները,

• ապահովել դրանց միասնական ըմբռնումը բոլոր պատասխանատուների կողմից,

• իրականացնել աշխատանքի հստակ բաշխում,

• սահմանել կատարման ժամկետներ և միջանկյալ վերահսկողության ձևաչափեր։

Մասնակիցների կազմը

Խորհրդակցությանը մասնակցում են․

• դպրոցի տնօրենը,

• տնօրենի տեղակալ(ներ)ը,

• առարկայական մեթոդական միավորումների նախագահները,

• այն ուսուցիչները, որոնք առանցքային դեր ունեն հունվարյան աշխատանքների իրականացման մեջ (նախագծային ուսուցում, ՆԴՎ, դաստիարակչական աշխատանքներ և այլն)։

Խորհրդակցության օրակարգը

1. Հունվար ամսվա ՈՒԴԱՏՊ-ի ընդհանուր ներկայացում

2. Երկրորդ կիսամյակի ուսումնական գործընթացի նախապատրաստում

3. Ուսումնական նախագծերի պլանավորում (7–11-րդ դասարաններ)

4. 12-րդ դասարանի պետական ավարտական քննությունների արդյունքների քննարկման կազմակերպում

5. Դպրոցի կառավարման խորհրդի նիստի նախապատրաստում

6. «Բանակի օր»-ին նվիրված միջոցառումների կազմակերպում

7. Ներդպրոցական վերահսկողության իրականացում

8. Աշխատանքի բաշխում, ժամկետների ամրագրում և վերահսկողության մեխանիզմներ

Խորհրդակցության ընթացքը՝ քայլ առ քայլ

1. Ներածական խոսք

Տնօրենը խորհրդակցությունը սկսում է՝ ընդգծելով, որ հունվարը ռազմավարական ամիս է, քանի որ հենց այս փուլում են դրվում երկրորդ կիսամյակի արդյունավետ աշխատանքի հիմքերը։ Շեշտվում է, որ բոլոր գործողությունները պետք է իրականացվեն ՈՒԴԱՏՊ-ի և ՀՊՉ-ի պահանջների համադրությամբ։

Տնօրենը ներկայացնում է խորհրդակցության տրամաբանությունը՝
ներկայացում → քննարկում → պատասխանատվության բաշխում → ժամկետների սահմանում։

2. Երկրորդ կիսամյակի ուսումնական գործընթացի նախապատրաստում

Տնօրենը և տնօրենի տեղակալը ներկայացնում են․

• երկրորդ կիսամյակի ուսումնական պլանի և դասացուցակի կազմման ընթացքը,

• դասաբաշխման սկզբունքները,

• 12-րդ դասարանում առարկայական խմբերի ձևավորման մոտեցումները՝ ըստ 2025–2026 ուստարվա ուղեցույցի։

Ամփոփվում է, որ այս փուլում կարևոր է խուսափել ուշացումների և ապահովել ուսումնական գործընթացի անխափան մեկնարկը։

3. Ուսումնական նախագծերի պլանավորում (7–11-րդ դասարաններ)

Տնօրենի տեղակալը շեշտում է, որ երկրորդ կիսամյակում ուսումնական նախագծերը պետք է․

• համապատասխանեն ՀՊՉ կարողունակություններին,

• ունենան հստակ նպատակ, արդյունք և գնահատման մեխանիզմ,

• քննարկվեն և հաստատվեն մեթոդական միավորումներում։

ՄՄ նախագահներին տրվում է հանձնարարական՝ ապահովել նախագծերի թեմաների քննարկման և պլանների փաստաթղթավորված գործընթացը։

4. 12-րդ դասարանի պետական ավարտական քննությունների արդյունքների քննարկում

Տնօրենը նշում է, որ քննական արդյունքների քննարկումը պետք է լինի վերլուծական, ոչ ձևական։
Քննարկման նպատակը ոչ միայն թվերի արձանագրումն է, այլև․

• արդյունքների պատճառների բացահայտումը,

• մեթոդական և կազմակերպչական լուծումների առաջարկումը,

• հետագա քայլերի պլանավորումը։

5. Դպրոցի կառավարման խորհրդի նիստի նախապատրաստում

Տնօրենը ներկայացնում է կառավարման խորհրդի նիստի երեք առանցքային հարցերը․

• առաջին կիսամյակի ֆինանսական հաշվետվություն,

• ուսումնադաստիարակչական գործունեության հաշվետվություն,

• դպրոցի զարգացման ծրագրի կատարման ընթացք։

Հստակեցվում է, թե ով և ինչ ժամկետում պետք է պատրաստի համապատասխան նյութերը։

6. «Բանակի օր»-ին նվիրված միջոցառումների կազմակերպում

Դաստիարակչական աշխատանքների կազմակերպիչը ներկայացնում է նախատեսվող միջոցառումների շրջանակը՝

• պանթեոն այցելություն,

• հանդիպում Արցախյան պատերազմների վետերանների հետ,

• դաստիարակչական միջոցառումներ և ցերեկույթներ։

Շեշտվում է միջոցառումների դաստիարակչական և արժեքային բաղադրիչը։

7. Ներդպրոցական վերահսկողության իրականացում

Տնօրենի տեղակալը ներկայացնում է ՆԴՎ-ի հունվարյան ուղղությունները․

• մատենավարության ստուգում,

• դասղեկի ժամերի իրականացում,

• ուսումնական նախագծերի և խմբակների գործունեության վերահսկողություն։

Ընդգծվում է, որ վերահսկողությունը իրականացվելու է շաբաթական ռեժիմով և պարտադիր փաստաթղթավորմամբ։

8. Ամփոփում և վերահսկողության մեխանիզմներ

Խորհրդակցության ավարտին տնօրենը․

• ամփոփում է բոլոր հանձնարարականները,

• հստակեցնում է պատասխանատուներին և ժամկետները,

• սահմանում է վերահսկողության ձևաչափը՝ շաբաթական աշխատանքային խորհրդակցությունների և ամսվա վերջում մանկավարժական խորհրդի ամփոփ նիստի միջոցով։

Եզրափակում

Լավ կազմակերպված հունվարյան աշխատանքային խորհրդակցությունը դառնում է ոչ միայն կառավարչական պարտադիր ձևաչափ, այլ իրական գործիք՝

• պլանավորման,

• պատասխանատվության բաշխման,

• և ՈՒԴԱՏՊ-ի արդյունավետ իրականացման համար։