ՄՄ նիստի պլանավորման, կազմակերպման և արձանագրություն կազմելու ուղեցույց

 

ՄՄ նիստի պլանավորման, կազմակերպման և արձանագրություն կազմելու ուղեցույց 

Մեթոդական միավորման նիստը պետք է ունենա հստակ վերնագիր, որտեղ պարտադիր նշվում են՝ 

• դպրոցի անվանումը,
• մեթոդական միավորման անվանումը, 
• նիստի հերթական համարը, 
• նիստի կազմակերպման ամսաթիվը։ 

Այսպիսով՝ նախ գրանցվում է դպրոցի անվանումը, ապա մեթոդական միավորման անվանումը, դրանից հետո՝ նիստի հերթական համարը և անցկացվող ամսաթիվը։ 

Մեթոդական միավորման նիստի արձանագրությունը սկսվում է օրակարգի ներկայացմամբ։ Օրակարգը ձևակերպվում է հերթականությամբ՝ հստակ սահմանելով քննարկման ենթակա բոլոր հարցերը։ 

Օրակարգի հարցերը, կարող են բաժանվել երեք հիմնական խմբի։ 

Առաջին խումբը կազմակերպական բնույթի հարցերն են, որոնք, որպես կանոն, կարճ քննարկում պահանջող հարցեր են։ 

Երկրորդ խումբը վերաբերում է մեթոդական միավորման կողմից իրականացվող միջոցառումներին։ Դրանք կարող են լինել 

• կամ արդեն իրականացված միջոցառումների արդյունքների ամփոփմանը վերաբերող հարցեր, 

• կամ առաջիկայում կազմակերպվելիք միջոցառումների պլանավորմանը վերաբերող հարցեր։ 

Հետևաբար, հարցը ձևակերպելիս անհրաժեշտ է հստակ նշել՝ 

• արդյոք տվյալ նիստում ամփոփվում են միջոցառման արդյունքները, 

• թե պլանավորվում են առաջիկա միջոցառումների մանրամասները։ 

Երրորդ խումբը ներառում է ուսուցման գործընթացին անմիջականորեն առնչվող հարցեր՝ մեթոդական և բովանդակային խնդիրներ, որոնք կապված են 

• հանրակրթության պետական չափորոշչի կարողունակությունների և վերջնարդյունքների, 

• գնահատման համակարգի, 

• առարկայական չափորոշիչների և առարկայական ծրագրերի պահանջների հետ։ 

Այս խմբում նույնպես կարելի է տարբերակել երկու տեսակի աշխատանքներ՝ 

• աշխատանքներ, որոնք պլանավորվում են տվյալ մեթոդական միավորման նիստում և հետագայում պետք է իրականացվեն ուսուցիչների կողմից, 

• և աշխատանքներ, որոնք իրականացվել են նախորդ նիստից հետո և տվյալ նիստում ենթակա են ամփոփման։ 

Օրակարգում հարցերի հերթականությունը չափազանց կարևոր է, քանի որ այն կապված է նիստի ժամանակացույցի ճիշտ կազմակերպման հետ։ Յուրաքանչյուր հարցի համար ցանկալի է նշել մոտավոր ժամանակային սահմանաչափը։ Սա թույլ է տալիս լուծել երկու խնդիր՝ 

• գնահատել նիստի ընդհանուր տևողությունը և կանխել ժամանակային գերծանրաբեռնվածությունը, 

• ապահովել քննարկման արդյունավետ ռեգլամենտ։ 

Օպտիմալ է, երբ մեթոդական միավորման նիստը տևում է առավելագույնը 1,5 ժամ։ Յուրաքանչյուր հարցի համար նախատեսված ժամանակը կարող է օգտագործվել որպես քննարկման ռեգլամենտ, օրինակ՝ հայտարարվում է, որ տվյալ հարցի քննարկման համար սահմանված է 3 րոպե, և խնդրվում է պահպանել ժամանակային կարգապահությունը։ 

Պետք է հաշվի առնել, որ նիստը երբեմն կարող է նախատեսվածից ավելի երկար կամ, հակառակը, ավելի կարճ տևել։ Հատուկ ուշադրություն պետք է դարձնել բովանդակային և ուսուցման հետ կապված ծանր հարցերին, քանի որ դրանց ավելցուկը կարող է հոգնեցնել մասնակիցներին։ Այդ դեպքում կա վտանգ, որ օրակարգի վերջին հարցերը կմնան անարդյունավետ կամ ընդհանրապես չեն քննարկվի։ 

Մեթոդական միավորման նիստի հիմնական հատվածը օրակարգում ընդգրկված հարցերի քննարկումն է։ Մեթոդական միավորման նախագահը ներկայացնում է տվյալ հարցը, դրա հիմնական գաղափարներն ու մոտեցումները, ապա առաջարկում գործընկերներին հանդես գալ իրենց կարծիքներով։ 

Երբ քննարկումն ավարտվում է կամ լրացուցիչ կարծիքներ չեն ներկայացվում, մեթոդական միավորման նախագահը ներկայացնում է տվյալ հարցի վերաբերյալ որոշման նախագիծը։ Եթե դպրոցում առկա են տեխնիկական հնարավորություններ, նպատակահարմար է որոշման նախագիծը ներկայացնել էկրանի վրա՝ խմբագրման գործընթացը արագ և արդյունավետ կազմակերպելու համար։ 

Քննարկումից հետո որոշման նախագիծը կամ լրամշակվում է, կամ ընդունվում է անմիջապես։ Այն հաստատվում է քվեարկությամբ կամ կոնսենսուսով և ամրագրվում որպես որոշում, որը կարող է ներկայացվել դպրոցի տնօրենին, մանկավարժական խորհրդին կամ ծառայել մեթոդական միավորման հետագա աշխատանքի կազմակերպման համար՝ որպես ուղեցույց։